2Cor 1 | BOJ | STEP | E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

2 Corinthians 1

Pol a Yesus Kristus na qariŋyej

1 E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum. 2 Gago Abu Qotei wo Tamo Koba Yesus Kristus wo naŋgi aiyel niŋgi qa are boleinjrimqa niŋgi lawo na soqniye.

Qotei na gago are latetgeqnu

3 Iga gago Tamo Koba Yesus Kristus aqa Abu Qotei aqa ñam soqtoqnqom. A gago Abu deqa a iga qa are tulaŋ boleiyeqnu. A iga qa dulqajqa utru. A tamo kalil gulube ti unub qaji naŋgo are latetnjro qaji Qotei. 4 Deqa a gago gulube kalil qa gago are latetgeqnu. Yeqnaqa aqa kumbra dena iga na olo kamba tamo uŋgasari gulube ti unub qaji naŋgo are latetnjreqnum. 5 Kristus a jaqatiŋ koba ej deqa iga dego jaqatiŋ koba eqnum. Kristus aqa kumbra dena Qotei na gago are olo latetgeqnu. 6 Iga gulube eqnum di aqa utru agiende. Iga gulube oqnimqa gago gulube dena nuŋgo are latetŋgwajqa deqa. Yim Qotei na niŋgi oqas. Ariya Qotei na gago are latetgoqnimqa dena dego nuŋgo are latetŋgwajqa deqa. Qotei a nuŋgo are latetŋgeqnu deqa jaqatiŋ iga eqnum qaji di niŋgi dego oqnsib siŋgila na tigelesqab. 7 Iga niŋgi qa gago areqalo siŋgilatosim endegsi maronum, niŋgi siŋgila na tigelesqab. Iga qalieonum, niŋgi iga ti beterosib jaqatiŋ eqnum deqa Qotei na niŋgi ti iga ti gago are latetgoqnqas.

8 O was qu, iga Esia sawaq di sosimqa gulube kobaquja item. Gulube dena iga ugeugeigosiqa gago siŋgila tulaŋ buŋyej. Deqa iga endegsi are qalem, gulube dena iga moiotgwas. O was qu, niŋgi di qalieqajqa deqa e anjam endi neŋgreŋyonum. 9 Bole, iga are qalem, gulube dena iga moiotgwas. Agi anjam pegiyo tamo a na tamo bei minjqas, “Ni une ti deqa ni moiqam.” Dego kere iga are qalem, gulube dena iga moiotgwas. Ariya Qotei aqa areqalo agiende. Iga gulube osim dena iga poigwas, bole, iga gago segi siŋgila qa are qalqasai. Iga Qotei aqa siŋgila qa are qalqom. Agi a na qujai tamo moreŋo qaji naŋgi olo subq na tigeltnjreqnu. 10 O was qu, gulube dena iga moiotgwa laqnaqa Qotei na olo iga aqaryaigosiqa gulube di taqal atej. Bunuqna dego a na iga aqaryaigoqnqas. Deqa iga Qotei qa gago areqalo siŋgilatosim maronum, a na gaigai gago gulube kalil qa aqaryaigoqnqas. Yim iga bole sqom. 11 Ariya niŋgi na dego nuŋgo pail na iga aqaryaigoqniye. Yim Qotei a tamo uŋgasari gargekoba naŋgo pail quoqnsim deqa iga aqaryaigoqnqas. Yoqnim tamo uŋgasari gargekoba naŋgi Qotei aqa kumbra di unoqnsib a biŋiyoqnqab.

Pol na Korin naŋgi gisaŋnjrosai

12 O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem. 13 Anjam kalil e neŋgreŋyosim niŋgi qa qariŋyonum qaji endi niŋgi sisiyosib poiŋgwajqa deqa neŋgreŋyonum. Bole, ijo anjam qudei qa niŋgi geregere poiŋgosaieqnu. Ariya ijo areqalo agiende. Niŋgi ijo anjam kalil qa poiŋgekritqas. Yim gago Tamo Koba Yesus a olo bqajqa batiamqa niŋgi e qa tulaŋ areboleboleiŋgim e kamba dego niŋgi qa tulaŋ areboleboleibqas.

15 E niŋgi qa ijo areqalo siŋgilatosim endegsi maronum, niŋgi ijo kumbra kalil qa areboleboleiŋgwas. Utru deqa e nami anjam endegsi qosem, e mati niŋgi qa bosiy nuŋgsiy olo niŋgi uratŋgsiy Masedonia sawaq gilsiy dena puluosiy bosiy niŋgi olo nuŋgwai. Deqa bati aiyel e niŋgi nuŋgwajqa are qalem. Yim ijo kumbra dena Qotei na niŋgi gereiŋgoaiyeltŋgwajqa deqa. E niŋgi olo uratŋgsiy Judia sawaq aiqa laqnitqa niŋgi silali qa aqaryaibibqa e gamq dia iŋgi bei qa truquaim deqa are qalem. 17 Ariya niŋgi kiersib are qaleqnub? Niŋgi endegsib are qaleqnub kio, “Pol aqa anjam di a dauryosai deqa a na iga gisaŋgej. A mandam tamo naŋgo kumbra dauryosiq deqa a anjam bei maroqnsiq olo urateqnu. A laŋa odoqnsiqa olo saideqnu.” O was qu, niŋgi e qa degsib are qalaib. 18 Qotei a na aqa segi anjam kalil dauryeqnu deqa e dego anjam bole segi niŋgi merŋgeqnum. Deqa e laŋa odoqnsim olo saidosaieqnum. 19 Nami e na Sailas na Timoti na iga qalub Qotei aqa Ŋiri Yesus Kristus aqa anjam palontosim niŋgi merŋgoqnem. Niŋgi qalie, Yesus a dego laŋa odoqnsiq olo saidosaieqnu. A gaigai Qotei aqa ñam na odeqnu. 20 Anjam di aqa utru agiende. Qotei a nami iŋgi iŋgi gargekoba iga egwajqa marej. Kristus a odeqnu deqa Qotei na iŋgi iŋgi di iga egeqnu. Deqa iga Qotei aqa anjam di quoqnsim iga Kristus aqa ñam na mareqnum, “Di anjam bole.” Osim iga Qotei aqa ñam soqteqnum. 21 Qotei a segi na iga ti niŋgi ti siŋgilatgeqnaqa iga Kristus beteryosim siŋgila na unum. A na qujai iga aqa segi tamo sqa marsiq giltgej. 22 Osiqa aqa segi toqor egsiqa gago are miligiq di atej unu. Aqa toqor di aqa Mondor Bole. Mondor di a na iga namo egej deqa iga qalieonum, bunuqna iŋgi iŋgi kalil a na iga egwa marej qaji di olo egwas.

Pol na naŋgi gulube enjraim deqa a Korin qureq olo bosai

23 O was qu, Qotei na ijo anjam siŋgilateqnu deqa e aqa ñam na bole maronum, e niŋgi gulube eŋgaim deqa e olo Korin qureq bosai. 24 Niŋgi Yesus qa nuŋgo areqalo siŋgilateqnub nuŋgo areqalo di iga na taqatgwajqa e deqa merŋgosai. Iga qalieonum, niŋgi nuŋgo areqalo di siŋgila na ojsib tigelejunub. O was qu, niŋgi tulaŋ areboleboleiŋgwajqa deqa iga niŋgi ti waueqnum.